https://youtu.be/R6lKeBCxIWI?si=uqKZksrvZB5pYaI9
1. Matak kasamaran pikir,
lamun teu sabar tawekal,
dibarengan gedé hate
ngalakonan perdjalanan
ku lobana halangan
pikeun ngangkat djeung ngadjungdjung
darajat bangsa sorangan
2. tapi mungguh maha sutji,
dina masihan lantaran,
sakitu kuring teh bodo,
asa gampang nga-hartina,
maklum kabeh geus aja,
aja di badan sakudjur,
terang njata ku wudjud-Na
3. tanggal hidji bulan Mei
poena dina Djumaah
ninggang pasaran kalwon
ngitung masehi tahuna
sarebu djeung dalapan ratus
djeung salapan puluh
tudjuh lalangkunganana
4. sim-kuring ka dunja lahir
kitu saur indung-bapak
nu njaksian lahir batos
nu wadjib dipertjajana
ku sim-kuring sorangan
tur wadjib dipandjang-pundjung
ti dunya tug ka aherat
5. mei teh pangeling-ngeling
tanggal bulan kalahiran
ari tugas anu tangtos
nja eta kartawinata,
ngartakeun ku winata,
nepikeun ka hasil maksud
hasil tina perdjalanan
6. Ti Purwa karta mimiti,
karta di djaman baheula,
Bandung anu djadi hate
ngabandungan nu kawasa
rasa anu njaksian
ajana gusti nu wujud
nu wadjib di-Pangeranan
7. Kebon Djatina pamanggih
nu njata ku perdjalanan
melak hade, buah hade
ku MAHA asal purwana
nja temen tinemenan
buktina ari geus wudjud
ku simkuring kuring lakonan
8. Djumaah poe nu sutji
kaliwon pasaranana
tanggal timbul aja hate
tudjuh welas ka sasama
september sasih salapan
tedak Wali maha agung
salapan etanganana
9. Tahun anu ka pi éling
sarebu sareng salapan
ratus pundjulna sajaktos
duwa puluh tudjuh njata
Di Subang-Purwakarta
Tjimerta nya ngaran kampung
Tjileuleuy ngaran walungan
10. Tengah poe sisi tjai
tjaang padang narawangan
anéh maké aja hate
tjai di itung lobana
dibarung kahéranan
mikiran tjai ti gunung
asalna ngan sing karetjlak
11.tapi palidna ka hilir
sakur anu kaliwatan
boh sawah atawa kebon
walatra kabaragian
tapi teu saat-saat
malah saméméh ka laut
tjai anggur ngagedean
12.kersana nu Maha Sutji
ku sim-kuring dipikiran
kapikir asa nu gélo
kadéngé aya sowara
tapi taya djalmana
ka kuring méré pitutur
purwa karta nusa njata
13. karta tengtrem hate kuring
ulah sok make itungan
lamun arek mere maweh
Tjileuleuy kudu turutan
Tji tjai Kahirupan
teu eureun-eureun tutulung
sapandjangna pardjalanan
14. kamurahan maha sutji
saestu taya surudna
Kanu Goreng jeung nu hade
Tanggungan sewang-sewangan
sing LEULEUJ migawena
ulah kaburu ku nafsu
matak goreng balukarna
15. Tjimerta mertakeun diri
kahirupan katengtreman
Subang ge nja kitu keneh
ngandung harti teu lumajan
su teh hade maksudna
bang nurut galur karuhun
bangsa pihartieunana
16. ari tahun ngandung harti
pranatan atawa tata
hidji nja gusti hjang manon
salapan wali-allahna
duwa ketjap tandingan
goreng hade, handap luhur
nu lumrah di alam dunja
17. Tudjuh tudjuan sing pasti
kitu harti eta angka
Hiji salapan dua téh
Angka tujduh panutupna
ngadjadi perdjalanan
sapandjangna aya umur
perdjalanan atjan tamat
Posting Komentar